Ev vîrûsa koronayê ku navê wê yê navnetewî Corvid-19 e, wek her qadên jiyanê bandor li qada wêjeyî jî kir. Em wek Koma Xwendinê ya Amedê xwedî biryar bûn ku roja piştî newrozê (22.03.2020), saet di 14.00ê da li Pirtûka Kurdî bi nivîskarê kurd Lokman Polat ra, li ser romana wî ya bi navê Sylvîayê gotûbêjek li dar bixin. Pêşniyaza vê gotûbêjê ji alîyê nivîskar ve bo komê hatibû kirin. Me jî pejirandibû. Lê dema ku vîrûsa koronayê pêşî li me û nivîskar girt, me biryar da ku em ê gotûbêja xwe bi awayek sanal pêk bînin. Her endamên komê dê wek min bîr û rayên xwe binivîsin û bi komê ra parve bikin.

Romana Sylvîa, bi navek din Koleya Bazirganê Jinfiroş a Lokman Polatê ku di serê romanê da wiha nivîsîye:
“Tesadûf jî têne min dibînin. Hem jî tesadûfên ecêb ku jiyana min û hestên min ê ruhî, derûnî serobin dikin. Ji bo ku bi tesadûfî min Sarayê(?) (ev hatîye jibîr kirin, kî ye, ji bo çi navê wê li virê hatîye nivîsîn, nedîyare) dît û ez bi êşa wê hesiyam, ez gelek li ber ketim. Di ser vê tesadûfê de du hefte derbas bûn, vêca tesadûfekî din rastê min hat û mûyên takê serê min rakir. Ev çi bû, ev çi tesadûfên ecêb bûn ku leqê min dihatin? Heşerîtîya min-tolazîya li pey keç û jinan, yanî çapkiniya min- ya deh sal berê, gunehên min yên wê demê niha derdiket(in) pêşiya min.”

Dunyaya Romanê

Em bi vê paragrafê baş pê dihesin ku dê nivîskar tolaziya xwe bide vegotin. Lê bi çavek ku hestê mêran di ser her tiştî ra digire bi jinekê wiha dide gotin: “… tu ji paş ve ketî hundirê min. (…) Ji ber xweşiya şehweta pevşabûnê ez dinaliyam.” (r. 13). Yanî nivîskar erotîzm û pornoyê li nav hev xistiye. Gelek rexnegirên kurd, li ser romana Lokman Polat a bi navê “Kewa Marî” (min vê romanê nexwendîye) rexneya ku nivîskar erotîzm û pornoyê tevlîhev dike û hestên xwe bi karekterên jin dide vegotin, kiribûn. Di beşên dawîn da, nivîskar hinek pornoya seksa anal rexne dike lê vebêjera jin ku karektera Sylvîayê ye, di dawîyê da li cihê Jikovê evîndarê wê, dibe bi Viktorê bazirganê jinfiroşîyê ra dide zewicandin. Bi kurtî roman ji hêla karaktera Sylvîayê ve tê vegotin.

Lokman (Dilperîn) li Polonyayê dest bi tolazîyê dike, weka her jin laşfiroşî dike nêzîkê Sylvîayê dibe. Heta pere dide wê, bi wateya ku ew qehpe ye. Lê çi hîkmet e ku Sylvîa bi evînek platonîk dibe evîndarê wî. Piştî ku Dilperîn çend car pê şadibe, vedigere Swêdê. Bi tevî ku bavê Sylvîayê burokratek payebilind ê rejîma sosyalîzmê ye jî nikare keça xwe bigihijîne Dilperîn. Karektera Julian evîndara bavê wê ye, ew ji wî keçek bi navê Lîza tîne dinê, lê bi Frederîk ra dizewice. Bi tevî ku bavê wê bi dîya wê ra zewiciye û Sylvîa hatiye dinê jî dîsa dibe evîndarê Elena ku rû nade wî. Ji ber vê evîna platonîk nexweş dikeve û dimire. Bavê wê, berî ku bimire, ew bi karmendek xwe ra bo agahî ji Simaîlê ku bi qaçaxî merivan ji Tirkîyeyê dibe Polonyayê, bigire dişîne Stenbolê. Li wirê di bûyerek sîxûrî da polîsê tirkan wê digirin, lê bi awayek xweş wê verê dikin Polonyayê. Ev helwest wek ku dê wergera bo tirkî li ber çavan hatibe girtin dixuyê. Sonyaya lezbîyen ku hevala Sylvîayê ye, diçe Almanyayê. Malîn keçek Swêdî ye ji alîyê Viktor ve bo jinfiroşên Kibrisê hatiye firotin. Sylvîa jî bo bazirganê jinfiroşê Swêdî hatiye firotin. Li Swêdê rastê Malîn tê û bi bavê wê ra dizewice. Piştî ku bavê wê dimire, bi awayek tesadufî, wek ku di paragrafa serî da hatiye nivîsîn, digihîje Dilperîn.

Encam

Nivîskar Lokman Polat, kesek gelek çalak e. 16 pirtûkên wî derketine. 6 ji wan jî bi navê xwe roman in. Gelek nivîsên wî li ser nirxandina romanan hene. Hewldana wî ya bo romanên wî bêne xwendin karek baş e. Lê divê hinek li ser derûniya karekterên xwe yên jin kûr bibe. Hestên jinan li gora zewqa mêran dernexe pêş. Eger karibe çend romanên Virginia Woolf lê bikole, dê gelek sûd werbigire. Romanên bi vegotina psîkolojîk ji romanên bi vegotina seksê bêtir tên xwendin. Romanên modern û postmodern ên vê serdemê bi piranî romanên psîkolojîk in.