Rojnameya Kurdistanê: Tu bixêr hatî Amedê. Em dixwazin hevpeyvîna xwe li ser cara pêşîn rasthatina te ya li rojnameya Kurdistanê bidin dest pê kirinê. Te kengê, li ku derê cara pêşîn rojnameya Kurdistanê dît?

Celîlê Celîl: Hûn di nava xêrê de bin. Min cara pêşîn hejmara yekem ya rojnameya Kurdistanê li Petersbûkê dît. Ew jî çîrokek balkêş e. Ez bi xwe her dem li bîblîyografyaya kurdî digeriyam. Min pir arşîva kurdî meraq dikir. Dema ez çûm zîyareta kekê xwe, Ordîxanê Celîl, karmendeke pirtûkxaneya Petersbûkê got ku rojnameyek bi tîpên erebî heye û li serê Kurdistan nivîsîye. Ez jî bi tîpên erebî nizanim, eger tu bixwazî ez karim wê bi te dim. Min jî got, baş dibe. Dema wê ew da min, mindît ku hejmara yekê ya rojnameya Kurdistanê ye û di nava wê de jî danasînek wê ya bi fransî jî heye. Ez tê gihîştim ku Rojnameya Kurdistanê ne tenê bo welat, belbî bo welatên ewropayê û kurdên li diyasporayê re jî hatiye şandin. Lê çend roj paşê karmendê li min gerîya got divê tu wê belgeyê paş ve bînî. Ez heyîrîm, min paş ve bir dayê. Min got çi bû? Wê got ku Marûf Xeznedar gotiye, ger tu paş ve nestînî ez ê şîkayeta te li ba rayedaran bikim. Li gor dîtina min, dibe ku du sedemên vê helwestê hebin: Yek, dibe ku Xeznedar sozê pere dabê. Ya duyem jî dibe ku bi rastî jî karmend tirsiya be. Paşê min di nivîsên Xeznedar de xwend ku wî jî vê hejmarê bikar anîye.

RK: Em dizanin ku te du hejmarên wenda (jimarên 10-12an) yên rojnameya Kurdistanê peyda kiribû. Gelo tu karî çîroka dîtina van du jimaran bi me re par vebikî?

CC: Vê pirsê dema ku min van jimaran radestî Dezgehê Bedirxanîya li Duhokê kir jî hat pirsîn. Min bersivek pir kurt da wan û ez wê bersivê bi te re jî par ve dikim: Ew jî ev e: “Tu li çi bigerî tu dê wê/wî bibînî.” Dîsa jî ez karim cihê min peyda kir bibêjim, ew jî Vîyanaya ku ev 20 sal e lê dijîm e.

RK: Pir baş e. Em û hemû kurd li jimara wenda, jimara 19an digerin. Ka çima nayê dîtin?

CC: Rast e. Lê ka em li cihê ku hejmara 18an derketîye binêrin, em dibînin ku ew li Cenewreyê deketîye û ya 20an jî li Brîtanyayê derketîye. Ev jî nîşandide ku qezayek bi serê hejmara 19an de hatîye û lewma nikaribûne wê hejmarê belav bikin. Lewma li dinyayê heta niha nehatîye dîtin.

RK: Spas ji bo vê hevpeyvîna kurt. Em bi rihetî dibêjin hevpeyvîna kurt da ku em karibin sozê pêwendîyek berdewam ji we bistînin. Gelo em ê karibin pêwendîya xwe bidomînin?

CC: Spas xweş, ez jî dixwazim bi kesên xizmetkarên kurdî re di nava pêwendîyan de bim. Lê cihûwarê min her diguhere. Geh li Vîyana, geh li Êrîwan im. Ka em binêrin.