Ev name ji me ra ji Sîdneyê hatîye şandin:

“Roj baş birayê minê Kurdperwer Kek Ahmed Can! 13-1-202

Belê, wekî gotina te îro roja sersala me ya nû ye ku li welêt, li
Dersimê me ji vê rojê ra "Goxend, Gaxend" digot. Di vê rojê da me bi
berfê Kalê Sipî çêdikir, em li dor kalo diketin govendê, me kilam
digot, hevûdu tandida dikir nav berfê û kêf dikir. Di şeva vê rojê da
jî hemû kebanîyên gund, hevîrê Zerfetê wekî tarê bêjingek diavêtin
binê sêlê, dipatin, piştî pijîbûne derdixistin, dûra bi kêrê qatê ser,
bi gilowerî derdixistin, bi kevçî diketin nav, rêç dikirin,
dipişirandin hûr dikirin, mezinê malê jî sê darikên taybet çêdikir ku
ji wan yek Cotkar, yek Dewlet, yek jî Qismet bû. Piştî hundurê wê
parxaça pahtî, bi dew sîyax dikirin ku rûn di binda dernekeve. Piştî
evqas kar, ew nanê pişartî dikirin hundur wê tara parxaçê, ew sê darik
jî dikirin nav. Darikê Cotkar hevcar bû, lê şiklê darikê Dewlet û
Qismetê min ji bîhrkirîye, nayê bîhra min, bibexşîne.
Belê, wexta ku kebanîya malê ew nanê pişartî dikir hundur tara
Zerfetê, qatê ser ku di destpêkê da derxistibû, dişikand, dikir
navînê, dûra dewê bi sîr berdida kevîya wî nanê pişartî, li pey ewqas
kar, vêca jî tawek rûnê germ û helandî berdida ser, dûra neferên malê
hemû li dor wê xwarinê kom dibûn û destpêka xwarinê dikirin.Tabî
xwarin bi tilîyên destan va bû. Di wê wextê da me kevçî nedidît. Tenê
çar,pênc kevîyê me yên darik hebûn, ew jî jibo gîrmî, ango jibo şorbê
bû, lê bi dor bi dor. Em di malê da 16 gewrî bûn. Eger di wexta
xwarina Zerfeta wê şevê da kê ku darikê Cotkar bidîtana, wate ew bû
ku, di wê salê da cotkarîya wî/wê û çandinîya wî û wê bi fermana Xwedê
baş bûya. Kê ku darikê Qismetê bidîtana, wate di wê salê da qismetê
wî/wê pirr baş bûya. Kê ku darikê Dewletê bidîtana, wate di wê salê
hem ew bibe mirovekî dewlemend, hem jî navbera wî/wê û dewletê baş
bibe.

Belê Kek Ahmed Can, sersala me wekî gotina te ev roj e, lê sed mixabin
her tiştên me yên dîrokî, adet, tore û hemû kevneşopîyên me li Bakûrê
Kurdistanê ji bîhrbûne; ziman têk çûye. Keç û dayîkên me şar, vale û
hêramên rengîn, gulikên serî morî û mircan ji bîhrkine. Serîqotî bûye
mode. Fîstanên şeş tejî kes li ser keç û jinan nabîne. Xwekirina van
kevneşopîyên me bûye şerm, dawera nezanîyê. Ku heye eger hêzek, ku ji
wî ra dibêjin "Xwedê" nepejirîne.
Herwaha bira can, min serê te êşand bibexşîne. Em jî bi dil û can sala
we ya nû ku em ji vê roja sala nû ra "Goxend, Gaxend " dibêjin, pîroz
dikin, li tev silavên biratî û Kurdperwerî tên çavên we maç dikin, di
her kar û barên we da saxî û serkeftin dixwazin. Ji Ezîz û Kemal ra
silavên me bibêje. Min çarînek jibo porê Kemal nivîsîye, dê ez piştî
çend rojan ji wî ra bişînim, bila ew ji we ra bixwîne. Birayê te
Rizoyê Dersimî û bermalîya wî Refah Xanim, Sydney. Bimînin di xweşîyê
da.”